دولة العدل

زى النهاردة من سنة اتقتل خالد سعيد على يد اتنين من افراد الشرطة قدام الناس فى الشارع وتابعت التحقيقات والاحداث والوقفات زى ناس كتير من وقتها .. افتكر انها كانت اول مره اسمع فيها جملة "يسقط يسقط حسنى مبارك" فى فيديو من فيديوهات الجنازة تقريبا .. يوميها اتفاجئت بشجاعة الناس وبصوتهم وهو بيجلجل وفيه نبره الم من ظلم كبير.. يمكن الجملة ماكنتش مسموعة وقتها بالنسبة ليا بس اكيد كانت محسوسة بالنسبة للكل .. بغض النظر عن رواية الشرطة لملابسات الوفاة وتقرير الطب الشرعى وتصديقى او عدم تصديقى للرواية .. لو خالد سفاح ومجرم ماينفعش تكون دى صورته بعد الوفاة لمجرد انهم بيحاولوا يقبضوا عليه وماينفعش اى متهم يعامل بالطريقة دى .. للاسف الداخلية رفضت التضحية باتنين عساكر(مخبرين) .. بعد سنة واكتر من 10 جلسات لسه القضية فى المحكمة ولسه الجانى متعاقبش ولسه تقرير الطب الشرعى ماتغيرش .. لكن قامت ثورة راح فيها الملك ووزيره والحاشيه كلها وبقى الدور على الاتنين عساكر وبقية الجلادين .. يارب نشوف العدل وهو بيتحكم بيه فى القضية دى .. يارب رجع حق كل مظلوم فى البلد دى . الله يرحمك يا خالد .

الشرطة فى خدمة الشعب

كانوا بيقولوا زمان اوى الشرطة فى خدمة الشعب .. وفى اواخر عهد المخلوع بقى الشعار " الشرطة والشعب فى خدمة الوطن " وبعد الثورة رجع تانى " الشرطة فى خدمة الشعب" بس للاسف من مساؤى الثورة " بصراحة اول حاجه احس بيها غير الحراك السياسى اللى مدوخ الشعب" ان السجل المدنى اللى هو مسئوليه الشرطة مبقاش يشتغل بعد الضهر وزى ما قالى احد رجال الشرطة البسطاء قدام القسم " من  بعد الثورة بقوا يشتغلوا فترة واحدة الصبح بس " يافرحتى بالثورة وبالشرطة فى عهد الثورة .. من الاخر كده المواطن مابيحسش ان فيه حاجه غلط الا لما يحتك بيها او تأثر عليه شخصيا .. على موقع وزارة الداخلية  وعلى صفحة خدمات الادارة العامة للمرور مكتوب ان الخدمات متاحة بالمواعيد من 8 صباحا الى 8 مساءا فهل ده فعلا صحيح ؟ الاجابة مش هتتعرف الا لما اروح ادارة المرور بعد الضهر زى ما هم كاتبين .. نفسى يخيبوا ظنى فى الناس اللى قالتلى انهم مش شغالين واروح الاقى المكان مفتوح وبيقدم الخدمة ... ربنا يسهل 

ملحوظة على الماشى : بيصرفوا لكل موظف وامين شرطة  يجى 1000 حضرتك كل يوم الصبح لزوم الادب والاحترام مع الزبون اللى هو احنا .. بس يبدوا ان الظباط مش نازل معاهم الاوبشن ده معظمهم بيخلص الخدمة وهو سايلنت .. ربنا يهديهم ويهدينا

Study Ball !!!

A 20-pound ball attached to a shackle and with Study Time Left (set up to four hours) for you or you kids have to keep studying, wow...what's that and if you need one? "The Study Ball gadget($115) is a prison-style ball and chain that you can program to keep track of how much time you spend studying. Once you've selected the desired duration, you chain the ball to your ankle and the manacle won't come off until the schedule study time is up. A red LED indicator displays the "Study Time Left" and keeps you informed as to how much longer you've got to keep studying. The ball and chain are made of highly durable steel and weighs a total of 9.5 kg / 20.95 pounds, which makes it difficult to move while wearing it. "

كنت بدور على صورة تعبر عن حالتى دلوقتى وتبقى هى كل البوست ..

وبعد مالقيت الصورة وبشوف مصدرها .. 

صُدمت بالفكرة نفسها وبوجود اختراع  زى ده 

وازاى انا النهاردة بعد كل سنين الدراسة دى بنجاحها وفشلها محتاجاه ..

اروح اذاكر بقى ..ربنا يهدينى                     

Note: The adv. was published by By Ben on Wed May 13 2009 @ http://www.likecool.com

3 يونيو .. اكتب ايه ؟

  على الرغم من الحاجات الكتيرة اللى نفسى اكتب عنها مش عارفه استقر على فكرة واحدة سريعة وبسيطة .. اللى جه على بالى النهاردة لاسباب معينة السينما .. الافلام وتصنيفاتها الـ Rating ومسألة مع او ضد العرى والقبلات والاحضان اللى فى الافلام ومسألة فرض الوصاية على المشاهدين .. فكرت برده فى موضوع كتب وبرامج التنمية البشريه وخطط تنظيم الوقت وتحديد قايمة بالمهام وترتيبها وازاى الاهم هو تطبيق المهارات دى بشكل متواصل .. فكرت كمان فى مسألة جواز البنات بعد التخرج من الجامعه او بعد انتهاء الدراسة عند الحد المعقول وازاى الموضوع ده واخد تصنيف عاجل او " AS Soon As Possible" وبعدين نزلت فيلم بنتين من مصر بعد ما لمحت فيديو منه على اليوتيوب وشدنى انى اتفرج على الفيلم كله .. اتفرجت على كام مشهد من الفيلم بشكل متقطع وقلبولى دماغى وانشغلت فى انى ماخلصتش الحاجات اللى كنت لازم اعملها النهاردة وانى عملت حاجات تانيه غيرها وخلص اليوم .. بس اللى حركنى فى النازع الاخير من اليوم انى احاول زى مابيقولوا انقذ ما يمكن انقاذه واعمل جزء صغير او كبير من الحاجات اللى كنت عاملة حسابى عليها .. فعلا فشل او نجاح الانسان بيبقى مبنى على استغلال طاقته ووقته فى تحقيق اهدافه .. اليوم خلص على بوست مقلوب وشويه من الغسيل وشويه من حاجات تانيه .. اسفه بجد ومكسوفة من نفسى ومنكم ..

دمتم فى امان الله 

2 يونيو واول تاج " تاج الثورة"

التاج ده من عند انسانه لكل المشاركين فى حملة التدوين اليومى لشهر يونيو 

• أين كنت أثناء مظاهرات 25 يناير؟
• فى البيت لانه اجازة رسمى  وعلى الساعة اربعة بدأت اتصل بالناس اللى كنت عارفه انهم نازلين علشان اطمن عليهم واعرف الامن بيتعامل معاهم ازاى .

• هل كنت تتوقع أن تؤدي هذه المظاهرات لثورة؟ 
 

• كان فى دماغى احتمالين مالهمش تالت:

• الاول: ان الموضوع هيمر زى اى مظاهرات عادية وعلى مستوى بسيط مع تكتلات امنيه ومنع المتظاهرين من الحركة .

• التانى : ان هيحصل شئ كبير جدا وغير متوقع وشكل البلد بعدها هيتغير بصورة كبيره

•   هل لديك تفسير للإنفلات الأمني؟

•   فى ايام الثورة الاولى كان مخطط من النظام السابق علشان يأكد الفوضى ويزرع الخوف ودلوقتى بقى قلة ثقه وقلة احترام بتزيد يوم بعد يوم بين الشرطة والشعب فى الاتجاهين :(   .. الشرطة تخلت عن اداء وظيفتها وكأنها بتحاسب جماعة من الشعب على مهاجمة اقسام الشرطة ايام الثورة او التعامل بطريقة غير مناسبة مع الشرطة فى الفترة اللى بعد كده .

• مصر رايحة على فين؟

• رايحة على ايام صعبة مش بسبب الوضع الاقتصادى ولا الاستثمارات ولا لهجة التخويف من الخراب اللى منتشره حاليا "صراحة مش مصدقه منها حاجه" .. لا .. ايام صعبة علشان فات اربع شهور ومفيش تغيير ملموس على ارض الواقع .. صراعات على تورته الثورة مابين ناس معظمهم كان حاطط رجل بره ورجل جوه فى معمعتها .. الشعب لا شايف انتخابات رئاسية ولا دستور جديد ولا انتخابات برلمانيه واتحول من شريك فى ادارة البلد الى عسكرى نفر جاهل لايملك حق تقرير مصيره يدار بصرامه وبغلظة من لواءات وقيادات عليا وهو لاحول ليه ولاقوة .

• ماذا فعلت وقت إنقطاع الإتصالات والإنترنت؟ 

•   استسلمت لمطالب امى اللى ماصدقت ان مفيش انترنت علشان اقلب البيت واغنى والله يازمن لا بأيدينا زرعنا الشوك ولا روينا يازمن .. وبعدها عيشت فى قلق اللجان الشعبيه والخوف على الاهل والجيران .

• ماذا كان رد فعلك بعد إعلان تنحي مبارك؟

• ماكنتش مصدقه وكنت فرحانه جدا وكتبت كلمه واحدة فى الـ Status على الفيس بوك " رحـــــــــــــــــــــــــــــــــــــــــــــل  "

• ما شعورك تجاه إستمرار وجود مبارك فى شرم الشيخ؟

• زى شعور اى مصرى .. احساس بالظلم وباننا بينضحك علينا واحنا ولاحول ولاقوة .. القانون بيطبق على الضعفاء بس فى البلد دى :( ولحد النهاردة

• هل إتفاجئت بحجم فساد النظام السابق؟ وضح؟

• مش اوى .. بس الملفات كتير والارقام مبالغ فيها .. مايهمنيش حاليا حجم الفساد ولا الثروات اللى جمعوها .. اللى يهمنى انى اقدر اثبت عليهم نص تهم الفساد والرشوة والتربح وغسيل الاموال وقتل المتظاهرين وغيرها  على الاقل واقدر احاسبهم عليها كويس من غير مايقول علينا الناس اللى بره اننا شعب همجى عمل ثورة جياع وبيحاسب رجال الاعمال والسلطة على ممتلكاتهم واستثماراتهم بدون التحقق من عدم مشروعيتها لمجرد التنكيل بيهم.

• هل غيرت الثورة شئ ما فى داخلك؟

• عرفتنى ان مهما كانت الدنيا ضلمه ومش شايفين اى امل فى التغيير ، الثورة على الحالة دى وعمل اى حركة لتغيير الوضع هيكون اثاره ونتايجه اكبر مما نتصور .

•  فى رأيك من هو " أحد قيادات الجيش " الذي يتصل دائماً ببرنامج (آخر كلام)؟!!!!ا

•   ممدوح شاهين

رئيس مصر الحالى

بينما اقلب عقلى بحثا عن فكره لأول تدوينة تلقيت استهجانا من احد الاصدقاء على تصريحات محافظ جنوب سيناء هنا  ونصها كالآتى:

مبارك مازال رئيسا بشهادة محافظ جنوب سيناء في تصريحاته للتليفزيون الكويتي

شوشة‮ :‬‮ »‬الريس‮« ‬في المكان الآمن الوحيد بمصر‮.. ‬وحسين سالم رجل ملتزم‮! ‬

اللواء محمد عبدالفضيل شوشة محافظ جنوب‮ ‬سيناء الحالي وأحد رجال النظام السابق‮  ‬مازال مصرا علي أن مبارك يحكم مصر حتي الآن‮.. ‬المحافظ أدلي بتصريحات‮ ‬غريبة ومستفزة للتلفزيون الرسمي الكويتي وقال‮: ‬ان شرم الشيخ هي المنطقة الوحيدة الآمنة في مصر بدليل اقامة‮ »‬الريس‮« ‬فيها حاليا في أمان‮.. ‬متحدثا عن مبارك دون استخدام كلمة‮ »‬السابق‮« ‬كما لو كان لم يعلم بعد ان مصر حدثت بها ثورة أطاحت بالنظام السابق الذي جاء به محافظا‮.. ‬واكد شوشة في تصريحاته ان وجود مبارك بهذه المدينة يعد اكبر دليل علي حالة الامن والاستقرار التي تتمتع بها محافظته وتحديدا مدينة شرم الشيخ‮ . ‬واضاف ان محافظة جنوب سيناء هي المحافظة الوحيدة في مصر التي لم يحدث بها أية حوادث‮.. ‬وذلك في اشارة الي ان باقي مدن ومحافظات الجمهورية‮ ‬غير آمنة امام السائحين العرب‮. ‬جاء ذلك علي هامش حضور المحافظ لحفل عشاء اقيم علي شرف زيارة وفد كويتي من المثقفين والاعلاميين الذين قاموا بزيارة عدة مدن مصرية من ضمنها شرم الشيخ بهدف دعم وتنشيط السياحة في مصر‮.. ‬مسلسل التصريحات الاستفزازية لسيادة المحافظ لم يتوقف عند الرئيس المخلوع محمد حسني مبارك فقط ولكن امتد ايضا الي صديقه ملك شرم الشيخ السابق رجل الاعمال الهارب حسين سالم‮.. ‬الذي قال عنه شوشة في مناقشات مع الوفد انه رجل ملتزم وانبري في الدفاع عنه مؤكدا انه لم يحصل علي متر أرض وقام بتسقيعه كما انه دفع ثمن الاراضي التي اخذها بالسعر العادي دون اي استثناءات‮.. ‬مضيفا انه ليس عيبا ان يحصل مستثمر واحد علي اكثر من مليون متر مربع في افضل مكان بشرم الشيخ طالما انه استغلها استثماريا واضاف الي الطاقة الفندقية للمدينة‮. ‬وفي الوقت الذي أدلي فيه محافظ جنوب سيناء بتصريحات مستفزة تأثيرها سلبي علي تشجيع السائحين العرب للعودة الي مصر‮..‬أدلي يوسف العميري رئيس بيت الكويت للأعمال الوطنية ورئيس الوفد الكويتي بتصريحات لتلفزيون الرسمي الكويتي اكد خلالها انه والوفد المرافق له زاروا العديد من المحافظات المصرية خلال الايام القليلة الماضية من بينها القاهرة والاسكندرية‮.. ‬واضاف انهم لم يجدوا ما يعكر صفو السائح‮.. ‬وقال‮ »‬مصر كلها آمنة‮«.. ‬ونؤكد لاهلنا في الكويت ودول مجلس‮ ‬التعاون الخليجي‮  ‬ان الاوضاع الامنية هادئة وآمنة‮ .‬

• فى البداية لم اصدق ان يقال هذا الكلام على لسان احد المسئولين الحاليين فى مصر .. المحافظ الذى يشرف على اغلى بقاع الوطن مازال يرى مبارك رئيسا وليس رئيس سابق بعد مرور اربعة اشهر على اسقاط الرئيس ونظامه .. ربما هنا يكمن السبب .. فالمحافظ واحد من رجال القوات المسلحة كغيره من المحافظين الذى رفعهم مبارك على رأس السلطة التنفيذية مع لواءات الشرطة فى معظم المحافظات وربما سيظل ولائه للسلطة العسكرية وقائدها الاعلى على الرغم من تبادل الادوار حاليا بين القيادات العليا للجيش ومبارك فيما يظن الكثيرمن افراد الشعب مؤخرا انها صفقه وتمثيليه هزليه صدقها الشعب .. وربما جاء دفاعه عن حسين سالم كنتيجة فعليه لشراكة امتدت سنوات بين العائلة الرئاسية ورأس السلطة التنفيذية والمالك الحقيقى للمدينة العالمية  .. مدينة السلام .. مدينة شرم الشيخ .
• بعد اسقاط النظام لم استسغ فكرة القائمة السوداء لهولاء الذين ايدوا النظام بشكل فج فى اقسى لحظات الثورة او الآخرون ممن غيروا موقفهم بالكامل حتى لا يكونوا ضد التيار العام للشعب وتأييده للثورة .. وايضا لم احبذ فكرة ان كل رجال النظام السابق يجب ان يرفعوا من مواقعهم او يستثنوا من العمل العام .. اعتدت قبل الثورة على تسمية اعضاء الحزب الوطنى العلنيين وغير العلنيين بأعضاء جمعية المنتفعين .. سلطة .. نفوذ .. تسهيلات .. بغض النظر عن مواقعهم استفادوا بانتسابهم للحزب .. امر الانتساب للحزب الوطنى له تريخ طويل معى لم يتم بشكل غريب ربما اتحدث عنه فى تدوينة قادمه.. فكرة اقصاء جميع مؤيدى النظام السابق والحزب الوطنى لم تبد لى صحيحة ولكننى اليوم حين اقرأ السطور السابقة اشعر بأن الثورة لم يشعر بها الكثيرون وكلما مر الوقت زاد عددهم وشعر الشعب ان دماء الشهداء والمصابين التى اريقت فى التحرير وبولاق ابو العلا والسويس والمنصورة والكثير من مدن وميادين مصر كأنها لم تكن .
• السؤال الذى يطرح نفسه الان كيف يمكن ان يشعر اى مواطن فى مصر بالامان فى ظل عدم وضوح الصورة بهذا الشكل ؟ الى متى سيظل مؤيدى مبارك السابقين الحاليين دون مراجعة للمواقف والتوجهات ؟ 
• عندما ظهرت حركة المحافظين الاخيرة دون تغيير العديد منهم والتحايل للابقاء عليهم مع تغيير اماكنهم تسآل الشعب لماذا لا يكون اختيار المحافظين بالانتخاب وكان ابسط الردود هو ان المحافظات المصرية ليست مستقلة وان منصب المحافظ منصب ادارى وليس سياسى وليس هناك استقلاليه لميزانية المحافظات او لادارتها ... ولكن الى متى سنبقى على هذه الحالة ؟
• اعلم ان الكثيرين الان مثلى يشعرون ان الثورة قد سُرقت وانها آلت الى قرارات من النائب العام لحبس رموز النظام السابق تباعا ثم خروجهم تباعا لعدم توافر ادلة تدينهم وان مكاسب الثورة بنهاية فبراير اعظم بكثير مما نراه الان ونلمسه بأيدينا .. اتمنى ان يخيب ظنى وان يضيف كل نهار جديد الى مكتسبات الثورة والى ابناء الوطن ليس تعويضا عن سنوات من الظلم ولكن لأنهم يستحقون دائما الافضل لهم ولوطنهم.